Ուր որ հայրենի երգեր կը լսուի՝ հոն հայրենիքը ողջ է …

Ղեւոնդ Ալիշան

Հոկտեմբեր է կրկին, Թարգմանչաց Տօն, Հայ գիրերու գիւտ , հայ մշակոյթ, բառերը լսելի են վարժարանիս մէջ ամէն տեղ, տեսանելի են ամէն անկիւնադարձին։ Վարժարանիս շրջաբակին մէջ բարձրաձայն կը թնդայ հայ երգը , որ յանկարծ իր հետ նաեւ  կը թնդացնէ խումբ մը մանուկներ,  որոնք ձեռք-ձեռքի տուած, ինքնաբուխ, կը պարեն զբօսանքի պահուն, ոգեւորելով հայ ուսուցիչներու հոգիները ։ Հոս Մերտինեան Վարժարանն է, հոս հայրենիքը ողջ է։

Ամբողջ ամսուան ընթացքին զանազան ձեռնակներով՝  Շրմըն Օքսի  Մերտինեան Վարժարանի մէջ, հայ մշակոյթին նուիրուած տարբեր միջոցառումներով, վարժարանս տարի  մը եւս յիշատակեց «Հայ Մշակոյթի Ամիս»ը ու հաստատեց, թէ մեր մանուկներուն հոգիներուն ու առօրիային մէկ անգակտելի մասն է ան անսակարկ։

Հոկտեմբեր 3-ին  Մերտինեանի  աշակերտները  անգամ  մը եւս  ունեցան  առիթը

« Touch of Art »   լուսանկարչական  ընկերութեան, հայկական տոհմիկ տարազներով լուսա-նկարուելու։

Հոկտ. 11-ին  ուսուցիչներու ընկերային յանձնախումբը,  տնօրէնութեան եւ ուսուցչակազմին համար ճոխ սեղան մը  պատրաստած էր ։ Ուսուցիչները հաճոյքով  ճաշակեցին բրինձով ու մեղրով լեցուած համադամ Ղափաման։

Աշակերտներուն մօտ ընթերցանութիւնը քաջալերելու միտումով այս տարի եւս, կազմակերպուեցաւ Գիրքերու եւ Յուշանուէրներու  Վաճառք ցուցահանդէսը, որ կայացաւ Հոկտեմբեր 17-20-ի միջեւ ։

Այս տարուան իւրայատուկ նախաձեռնութիւններէն մէկն էր,  School Spirit Committee-ի մրցումը՝ իւրաքանչիւր դասարանի աշակերտները հայ մշակոյթին նուիրուած նիւթով մը զարդարեցին իրենց դասարաններուն դռները ։ Է. Կարգի աշակերտները շահեցան մրցանակը ։

Ուրբաթ , Հոկտեմբեր 20-ը Մերտինեանի աշակերտութեան համար “ Spirit Day” էր. անոնք ազգային դրօշի գոյներով հագուած ու զարդարուած հպարտութեամբ եկած էին դպրոց։ Խանդավառութիւնը անսահման էր, մանաւանդ որովհետեւ դասաւանդութիւնը մինչեւ կէսօր էր ։ Կէսօրին աշակերտներ, ուսուցիչներ, ծնողներ եւ վարժարանիս պատկան մարմնի անդամներ միասին ճաշակեցին համեղ խորովածը ։ Սրահին մէջ նաեւ վարժարանիս նուիրեալ Ծնողա–Ուսուցչական մարմնի կողմէ հայկական ճաշերու վաճառք կազմակերպուած էր։

Ժամը 2-ին բոլորը ուղղուեցան Պուլղուրճեան սրահ, վայելելու յայտագիր մը ։ Ծաղիկ եւ առաջին դասարաններու աշակերտները ելոյթ ունեցան խմբային երգերով, արտասանութիւններով եւ հայկական պարերով՝ նուիրուած հայ զինուորին ։ Ապա անոնք ներկայացուցին Մերտինեան Վարժարանի պատմականը, տեսաերիզով մը զուգորդուած։

Է. և Ը. կարգի աշակերտները ստանձնած էին հանդիսավարի դերը եւ այս օրուան համար պատրաստած էին հայ երաժիշտներու՝ Կոմիտասի, Արամ Խաչատուրեանի,  Բարսեղ Կանաչեանի եւ Տիգրան Մանսուրեանի  մասին տեղեկութիւններու եւ սահիկներու ցուցադրութեան փունջ մը իրենց երաժշտութեան ուսուցիչի ղեկավարութեամբ։ Հարկ է նշել նաեւ թէ սրահի պատերը կը զարդարէին տարբեր դասարաններու մէջ կատարուած աշխատանքներու որմազդներն ու արուեստի գործերը։

Հանդէսի աւարտին Վարժարանիս տնօրէնուհին Տիկին Արսլանեան խօսք առնելով շնորհաւորեց եւ գնահատեց  յայտագրին մաս կազմած աշակերտները,   շնորհակալութիւն յայտնեց ուսուցիչներուն, որոնց միասնական աշխատանքի արդիւնքն էր այս հրաշալի հանդիսութիւնը։

Վառ մնայ հայ մշակոյթի կռուան հանդիսացող հայ վարժարանն ու անոր մշակներու կրակը, թող թնդա՛յ հայ երգն ու խօսքը իւրաքանչիւր հայ երդիքին տակ։ Փառք ու պատիւ մեր մշակոյթը կերտողներուն ։