ՄԵՐՏԻՆԵԱՆ ՎԱՐԺԱՐԱՆԻ ՎԵՐԱՄՈՒՏԸ

Վերամուտ է։ Մերտինեան Վարժարանի տնօէնութիւնը, ուսուցչակազմը, աշակերտներն ու ծնողները երկու ամսուան դադարէ մը ետք, կը վերադառնան դպրոցական իրենց առօրեայ կեանքին ու մարտահրաւէրներուն։ Վարժարանս, 37-րդ տարին ըլլալով կը բանայ իր դռները հայ մանուկներուն եւ պատանիներուն դիմաց ու գրկաբաց կ՛ընդունի զանոնք, խոստանալով ապահով միջավայր, ուր հայ մանուկը հասակ պիտի առնէ ու զարգանայ հոգիով ու մտքով։

Երկուշաբթի, Օգոստոս 20, 2018, առաւօտեան ժամը 8-ին հնչեց դպրոցական ներկայ տարեշրջանի առաջին զանգը եւ Մանակապարտէզէն մինչեւ 8-րդ կարգի աշակերտները իրենց ուսուցիչներու ընկերակցութեամբ շտապեցին դէպի վարժարանիս «Արամ եւ Անայիս Տ. Պուլղուրճեան» սրահ, ուր իրենց կը սպասէին Տնօրէնուհին ՝ Տիկին Լինա Արսլանեանը, հոգաբարձութեան ներկայացուցիչ՝ Տիկին Րիթա Մէնէշեանը, Պատուելի Հէնրիկ Շահնազարեանը եւ վարժարանիս ծնողներու ստուար հոյլ մը։

2018-2019 տարեշրջանի բացման արարողութեան, աշակերտները նախ ամերիկեան եւ ազգային ուխտերը կատարեցին եւ ապա Տիկին Ալիս Տէր Գէորգեանի ղեկավարութեամբ` երգեցին զոյգ քայլերգները, որուն յաջորդեց Սաղմոս 23-ի արտասանութիւնը, կրօնի բաժանմունքի պատասխանատու՝ Տիկիn Լենա Էքմէքճեանի առաջնորդութեամբ։

Տիկին Արսլանեան ողջունեց բոլորը եւ ապա հրաւիրեց Պատուելի Հէնրիկ Շահնազարեանը, որ աղօթքով ու աշակերտներուն ուղղուած հոգեպարար պատգամով իր բարեմաղթութիւնները փոխանցեց Մերտինեան Վարժարանի մեծ ընտանիքին։ Ապա Տիկին Արսլանեան բեմ հրաւիրեց հոգաբարձական կազմէն Տիկին Մէնէշեանը, որ իր խօսքը փոխանցէ աշակերտներուն։

Տիկին Արսլանեան հաճոյքով յայտարարեց վարժարանիս աշակերտներու թուական աճին մասին եւ արագ ակնարկ մը կատարեց ամրան կայացած ճամբարի իրագործումներուն եւ յառաջիկայ տարուան իրագործելիք ընթացիկ ու նոր ծրագիրներուն վրայ, հաստատելով թէ, ընդառաջելով ծնողներու փափաքին, արդէն իսկ գործի կը դրուի արեւմտահայերէնի զուգահեռ, արեւելահայերէնի դասաւանդման կրթական ծրագիրը նախակրթարանի առաջին երեք դասարաններուն մէջ։ Ան յորդորեց ծնողները գործօն մասնակցութիւն բերելու վարժարանի առօրեայ աշխատանքներուն, յանձնարարելով, որ սերտ կապեր ունենան դպրոցին հետ՝ կամաւոր ծառայութիւններ մատուցելով անոր։

Ապա Տիկին Արսլանեան ներկայացուց 2018-2019 տարեշրջանի ուսուցչական կազմն ու պաշտօնէութիւնը, բոլորին մաղթելով առողջ, յաջող եւ իրագործումներով լի տարեշրջան մը. ան իր երախտագիտական զգացումները յայտնեց անոնց, որոնք ոգեւորութեամբ աշխատեցան սատարելով նոր տարեշրջանի հեզասահ ընթացքին։

Բացման հանդիսութիւնը փակուեցաւ «Հայր Մեր»ով, որմէ ետք աշակերտները նոր խանդավառութեամբ մեկնեցան իրենց դասարանները, հանդիպելու իրենց ուսուցիչներուն, նոր ու նախկին դասընկերներուն եւ սկսելու նոր տարեշրջանը նոր յոյսերով, նոր խանդով։

Նոյն օրը ժամը 9:30-ին տեղի ունեցաւ Մերտինեան Վարժարանի Նախամանկապարտէզի վերամուտի հանդիսութիւնը։

Խօսք առաւ Նախամանկապարտէզի պատասխանատու Տիկին Մարիժան Գէորգեանը, որ իր կարգին ողջունեց բոլոր ծնողները վստահեցնելով, որ Մերտինեանի Նախամանկապարտէզին մէջ իրենց զաւակները պիտի վայելեն սէր, գուրգուրանք եւ հոգածութիւն։ Ապա բոլորը ուղղուեցան իրենց դասարանները, ուրկէ կէսօրին մեկնեցան տուն։

Բարի վերադարձ դպրոց ու բարի տարի։